Markobar Pernikahan Adat Mandailing: Perbedaan antara revisi

''Assalamualaikum wr wb. Yabó ia mora nami songoni na tobang dohot na toras, tarlobi-lobi ompu rajai sian bagas godang. Baen na adong dope na sangkot syair di bagasan roha, na tungkol boti di bagasan ngadol, na ngot-ngot di bagasan ipon. Ja na marsapa boti marguru sanga pade dope hami surdu burangir nami on, anso bisa doma hami mandokon hatana. Botima hatana Assalamualaikum wr.wb Hata Topot Kahanggi Tompas Bona Bulu: Assalamualaikum wr.wb. Dohot hormat, santabi sappulu, sappulu noli hami marsantabi maradopkon kahanggi, anak boru, mora, mora ni mora, na tobang dohot na toras, tarlobi-lobi ompui rajai na mijur sian bagas godang, umumna hita boti na markoum marsisolkot na adong di bagas parpituan na martua on Olo ia tutu, ditumopot ditumunjung nami onma di borngin ni ari on, onma na mantaringoti domu-domu ni daganak onma di ari na solpui. I pe nian sasudena hami dohot mora sian bagas on mandung dapot panamana Tai rupa songonido, olat mora dopentong dohot anak boruna, angkon na ipajugukdo tongkinnai patik-patik ni paradaton onma di Saba Jior Julu on, onma dalan nami angkan na manyangkili hata-hata paradaton. Jadi on pe so surdu napuran nami, ja na marsapa boti marguru, songon pandokon ni halak, pamuru pamarae di lombang ni sialogo, bahat hami marguru manyapai arana on hami ngada mamboto sanga songondia non panamana. Urang lobina hami bahat mangido moof dohot mangido izin Botima hatana. Assalamualaikum wr.wb. "Setiap kali telah selesai hata marsapa manyurdu, salah satu perwakilan hatobangon atau harajaon menjawab atau mempersilakan permohonan tersebut." Hata Sian Hatobangon/Harajaon?: Assalamualaikum wr.wb. Dohot hormat, santabi sappulu, sappulu noli hami marsantabi maradopkon kahanggi, anak boru, mora, na tobang dohot na toras, tarlobi-lobi ompui rajai sian bagas godang.Di diama nangkinin di hombang ni burangir ni anak boruna na ro sian Barbaran onma satontang angkan na manyalosehi hata-hata paradaton. Anggo ido na tutu na peto dei. Tai songoni dontong rupa, angkon na tartas- tasi homu dontong rura-rura, tartompas homu tano bona bulu, adong dontong syarat rukunna, anso bisama siborang hata on onma tu patik-patik ni paradaton na adong di Saba Jior Julu on sasudena. Baen di son dontong barisan kahanggi ni munu angkan na bisa manyiborangkon hata. Pudu homuma jolo non pokat sanga songondia non panamana, sanga songondia maksud dohot tujuanna. Botima hatana. Assalamualaikum wr.wb. Hata Kahanggi Na Itopot: Assalamualaikum wr.wb. Dohot hormat, santabi sappulu, sappulu noli hami marsantabi maradopkon mora, kahanggi, anak boru, tarlobi-lobi na tobang dohot na toras, songoni juo ompui rajai sian bagas godang, umumna hita boti na markoum marsisolkot na adong di bagas parpunguan na martua on. Olo ia tutu, di diama nangkinin hata na ipatujolo onma kahanggi niba na sian Barbaran i, dohot surdu napuranna onma satontang domu-domu ni daganak di ari na solpui onma rupa mandung dapot panamana. Tai rupa songonido, olat na marmorado songoni na maranak boru dope sian Barbaran dohot Saba Jior Julu on. Jadi onma dah, baen onma ari na uli boti ari na gabe, ro nangkinin surdu napuranna angkan na manyalosehi hata-hata paradaton. 1 pe nian sasudena mandung dapotdo disambut saluangi barisan na tobang dohot na toras, angkon na adongdo syarat rukunna, tartas-tasi rura-rura, tartompas nian bona bulu. Baen di son dontong ni ibana barisan ni kahanggi. Jadi onma dah na mangalusi hata ni barisan na tobang dohot na toras. Baen hamima di son barisan ni kahanggi na sian Barbaran i na adong di Saba Jior Julu on dalan pabotohonnama on tu maradu na tobang dohot na toras, ompui rajai sian bagas godang Hamima di son barisan ni kahanggina onma angkan na manyiborangkon hata tu patik-patik ni paradaton songoni tu mora nami na adong di bagas on. Anggo satontang manastasi rura-rura dohot tompas bona bulu, anggo i na botoma non hami di si, mandung sahatma tangan nami sasudena. Botima dah hatana. Assalamualaikum wr.wb''

"Salah satu mewakili atau bisa bergantian berbicara. Jika keduanya bersedia berbicara maka pembicara terakhir selalu dari pihak harajaon."

# '''Patibal sere''' Surdu Burangir Ruas Pasada Hata Marsapa Manyurdu Assalamualaikum wr.wb. Mora nami, na tobang dohot na toras, tarlobi-lobi ompui rajai sian bagas godang, baen na adongdo burangir na ipataya-taya anak boru nami, ja na marsapa boti marguru sanga padedo hami surdu anso bisa doma hami mamangkal hatana. Assalamualaikum wr.wb. Hata Sian Suhut: Assalamualaikum wr.wb. Parjolo sanoli marima hita mangucapkon syukur tu hadirat ni Allah SWT na mandung mangalehen hairasan boti dohot hasampatan sahinggo hita dapot marpungu, marlagut onma di haratak na martua on. Di pudi nai ngada lupa hita mambaca solawat dohot salam na hita tujuon tu nabinta Nabi besar Muhammad SAW, harana dohot syafaat ni ibanama angkan hita haropkonon mulai sian alam dunia on tarlobi-lobi saulakon pala mandung muli hita tujolo ni Allah SWT. Dohot hormat, santabi sappulu, sappulu noli hami marsantabi onma di hajajuguk ni kahanggi, anak boru, mora, mora ni mora, tarlobi-lobi na tobang dohot na toras, songoni juo nian na ipatobang, na ipasumurung lobi ompui rajai na mijur sian bagas godang, umumna hita boti na markoum marsisolkot na adong di bagas parpituan na martua on. Di diama bona-bona ni hatana, ngada on salain na mantaringoti sitta-sitta di alam matobang Tubuan laklak boti tubuan singkoru, tubuan anak boti tubuan boru. Di hal ningonma di godang ginjang sinuan tunas nami mandung leleng lamba on jongjong di na poso bulung na suadongdo on simambuat siubeonna di potang ni sijumadang ari songoni juo di manyogot ni sijumadang ari, na tataring marlao-lao dope ibana. Tubu di rohana angkan na manjalaki rongkap ni tondi, dongan markaya, dongan martahi ima na mamolus paradaton matobang na mangkarejoon sunnah ni Nabi Sampe-sampedo marjamita ibana tu simatobangna. Sanga di dia dabo boti rura parsobanan, aek boti pandurungan, huta angkan na ijalangan, onma angkan na manjalaki rongkap ni tondi. Ro alus simatobangna, baen marbangkiang-bangkiangdo barisan tiang ni mora na adong di bona bulunta on. Tatapma boti amang tu jae dohot tu julu, tu lombang dohot tu dolok, onma barisan tiang ni moranta na adong di bona bulu on. Di bagasan ni ima dah sinuan tunas nami marlao-laodo ibana onma tu jae dohot tu julu na manopoti tangga-tangga ni mora. Itatap boti tu jae, na juguk dope nian di bangku sikola, itatap boti tu julu na markalamotan dope, na suadong dope dongan ni ibana na angkan bisa mamolus paradaton matobang Ngada tarpili baya bagian, ngada tartodo baya tumpukan, di bagasan ningi, songondia pandokon ni halak muda adong dontong rura tontu adongdo singkoru, muda adongdo huta adongdo boru. Dipatantan boti simanjojakna, dipagayung alang simangidona na paulu- ulu dalan ja na topotma ibana onma tu Saba Jior Julu. Hami pe dah sian simatobangna, ngada lupa hami on manuturi rap marpoda-poda. Muda ama tong na ditinggalkon tontu amama na ditopotkon, muda kahanggi na ditinggalkon tontu kahanggima na ditopotkon. Di si ditopotkon sinuan tunas nami onma barisan kahanggi na adong di Saba Jior Julu on sanga adongdo na golom di tangan onma jagar-jagar ni mora. Ro alus ni barisan ni kahangggi na adong di Saba Jior Julu on, anggo na golomdo boti amang di tangan ngada dong, tai tinggallagi mulai ngon siamun tu siambirang salain bagasta on, na bagas pangidoan boti pangalehenanma on di ibana. Di bagasan ningi marlao-laoma sinuan tunas nami onma di bona bulu Saba Jior Julu, manatap boti tu jae dohot tu julu, tu lombang boti tu dolok, rupa tarpaidama nian di ibana ire abit na lambat buruk onma na idokon ni halak undung-undung di ari logo, saung-saung boti di ari parudan, gobak-gobak baenan di ari na ngali, onma rupa jagar-jagar ni mora na adong di Saba Jior Julu on. Isiborangkondo songon hata sanga tarbaen tali tu puyuan, sanga satahi angkan na mambuat sada tujuan, ima na langka matobang, langka matua bulung Ro alus ni jagar-jagar ni mora, itulak boti ngada tartulak, jagit ngada tarjagit. Anggo isusuk on simata, obanon boti tu mandalasena, ahama boti janggal salana, anggo dalan tu padena. Tai tinggal lagi bona bulu na ipasogit di Saba Jior Julu on, na marpantak marpago- pago, marranting boti marrungga soit. Arana ibado dah na pasdo iba on songon arambir na marsitiop di tangkilna, marsigogoon di mayanganna, tai gonggom boti saludang les muli-muli tu amangdo boti nian suatna sasudena. Di bagasan ni i marsimulak mulima si nuan tunas nami tu bona buluna ima tu Barbaran manjamitaonna tu hami bahaso hatana mandung sangkot maradopkon jagar-jagar ni mora na adong di Saba Jior Julu. Pabege-bege i hami dah, ja na tuk, ja na godang lomo roha nami, sampe-sampedo boti hami palagut markahanggi boti maranak boru dalan marpokat padomu tahi dohot sasudena sanga na idia doma angkan na hata patujuloon maradopkon mora na adong di Saba Jior Julu. Onma hami utusdo na dua halak sadalanan, markahanggi maranak boru dalan manyuruk sendal ni mora. Jadi ipe nian sasudena dohot tolong ni Allah SWT ja na marsapa do hami, marsise tu maradopkon mora nami sanga na tutu na petodo hata-hata ni daganak sanga na gonjak sianyang, muda na tutu na peto antong tu hami les marpangido hami dipasaut boti dipatulus satontang paradatonna. Hami padangka songon ayu, dipasirpang boti songon dalan, laos hami sapaido batang boban, anggo ido dah dohot tolong ni Allah SWT mandung dapot nian panamana. Ro alus ni mora, olat ni hita dope on anak boru niba na sian Barbaran, songoni mora munu na adong di Saba Jior Julu on. Harana di Saba Jior Julu on nai andang ni paradatondo hita, marpasak boti marbaling-baling marranting boti marrungga soit, na marhatobangon, na marharajaon, angkon les na rodo homu di dia tongkinnal ari na tupa, ari na uli, boti ari na gabe ima di haroro munu na manyangkili, na manyalosehi hata-hata paradaton sasudena. Jadi baen mandung dapot maso dohot waktuna, dohot katikona sasudena, rodo boa-boa ni mora nami maradopkon anak boruna na adong di Barbaran bahaso suada halanganna rap lagut jolo hita non borngin laos patibal sere ningibana. Jadi onma dah anso ro hami martinuntun boti markahanggi maranak boru, songondia nangkinin di surdu burangir nami na parjolo ja na marsapa boti marsise sanga les tu budaya dope hata-hata ni daganak sanga na gonjak sianyang. Muda na les tu badaya dontong les marpangidoma dah hami tu barisan mora, tarlobi-lobí na tobang dohot na toras, songoni na dipatobang di banua on, tarlobi-lobi ompui rajai sian bagas godang, martoruk abarado nian ibana. Di diama nian olos andung nami on, dapot dipasaut boti dohot dipatulus sasudena. On pe dah, baen isondo barisan anak boru nami na malo mangatak dohot mangetong on sasudena, ahanon na urangna, boti ahanon na lobina Anggo hami dah sian barisan anak boru munu na ro on urang lobina hami bahat mangido izin dohot mangido moof na sagodang-godangna. Usudahima dohot salam Assalamualaikum wr.wb''.<ref>{{Cite book|last=A.Pulungan|first=Alpi|last2=Hasibuan|date=Irfan|title=Markobar Sidang Adat Angkola-Mandailing|location=Jakarta|publisher=A Publishing|isbn=9786233064682|url-status=live}}</ref>