Kwee Thiam Tjing: Perbedaan antara revisi

Ini hari satoe redacteur kita, jaitoe toean Kwee Thiam Tjing, ditangkep, atas
prentah voorzitter landraad, kerna persdelict, jang besok bakal dipreksa.
Prentah boeat tangkep soedah dikeloearken lebih dari satoe minggoe, tapi
lantaran toean Kwee baroe semalem kombali dari verlof dan tadi pagi baroe bisa
dateng serahken dirinja di hoofbureau van politie, maka penangkepan itoe baroe
ini hari dilakoeken.

Hoofdredacteur kita lantas, menginget itoe bitjara dari toean Wienecke, minta
pada assistent-resident boeat, soepaia toean Kwee tida diborgol. Sebab terlaloe
repot sama laen² oeroesan, kerna ada banjak tamoe, assistent-resident
berdjandji aken sebentar lagi kasih kabar pada kita. Sementara itoe
hoofdredacteur kita tanja sama hoofdjaksa, jang menerangken, memang betoel ia
atawa assistent-resident ada hak dan kekoeasaan boeat prentah, menjimpang dari
atoeran biasa, aken djangan borgol orang tahanan jang dibawa dari satoe kelaen
tempat.

Directuer boewi atawa laen pembesar boewi tida tjampoer soeatoe apa dalem itoe
perkara. Hoofdjaksa tida ada kebratan aken prentah djangan borgol toean Kwee.
Sebentar lagi assistent-resident telefoon pada kita poenja hoofdredacteur dan
kasih taoe djoega, toean Kwee Thiam Tjing tida aken diborgol, baek ini hari
waktoe dianter ke pendjara, maoepoen besok, kaloe ia dibawa dari pendjara ke
gedong landraad.

Kita nanti toelis fatsal borgol orang tahanan atawa hoekoeman jang boekan
bangsa Europa.