Bathin III, Bungo

MITHOS TEMBO MARGA BATHIN III ILIR

Bathin III
Kecamatan
Negara	Indonesia
Provinsi	Jambi
Kabupaten	Bungo
Pemerintahan
• Camat	-
Populasi
• Total	18,896 jiwa jiwa
Kode Kemendagri	15.08.11
Kode BPS	1509025
Peta Wikipedia | Kode sumber | Tata penggunaan Koordinat: 1°28′5″S 102°8′1″E

(KECAMATAN BATHIN III)

Tasebut dulu semaso zaman seisuk, konon kabanyo di Tanah Minang Negeri Pagaruyung,  tersebut seorang Rajo nan memerintah banamo Sutan Siak Indo Karawo, mempunyoi anak tigo orang, nantuo banamo Sutan Karamayana Karamo Yudo, nama menengah banamo Sitan Tengiling Singo Yahudo, nan bungsu banamo Puti Serunduk Pinang Masak

Tersebut Sutan Karamayana Keramayudo menghadap menghaturkan sembah, Bermohon kepado orang tuonyo Tuanku Rajo Sutan Siak Indo Karawo, Ingin bajalan hendak bekalana, Mengembara di hutan rimbo, menuju arah matohari hidup, Kok bukit nan tingi lah didaki, lurah nan dalam lahdituruni, Payo nan leba lah diarungi, Pamatang panjang lah pulo dijalani., alkisah sampai kironyo disuatu tempat nan banamo Dusun Teluk. Dak lamo seketiko itu, Sutan Karamayudo beserta rombongan menghulu batang ayik, Batang Bungo Kato rang kini.

Kunonlahpulo adik Sutan Karamayana Karamayudo nan banamo Sutan Tenggiling Singo Yahudo, menghadap menghaturkan sembah, kepado ayah kandung Tuanku Rajo Sutan Siak Indo Karawo, mohon izin hendak menurut mencari kakak kandungnyo Sutan Karamayana Karamayudo nan lah lamo pegi dak kunjung balik. Abih taun baganti taun, tidak tentu kaba barito. Bajalanlah Sutan Tengiling Singo Yahudo menuju hutan rimbo lepeh, menuju arah matohari mati. Dek lamo bajalan menempuh rimbo, sampailah pulo di sebuah hulu sungai nan disebut Sungai Dani. Terus bajalan mengilir sungai. Alkisah Sutan Tanggiling Singo Yahudo batemu dengan rombongan Sutan Karamayana Karamayudo tersebut di Sungai Bakupeh.

Dekbertaun-taun lamo bapisah, Sutan Karamayana Karamayudo duo dengan Sutan Tenggiling Singo Yahudo idak tau maso Nyo bersaudaro, terjadi cekak dengan kelahi, memperebutkan daerah tanah hendak dikuasoi, siapo nan kalah siapo nan menang nyatonyo pedang patah tigo. Disitu tau maso inyo bersaudaro. Akhirnyo timbul kato saiyo Sutan Tanggiling Singo Yahudo tetap di Sungai Bakupeh, Sutan Karamayana Karamayudo balik mengulir ke Dusun Teluk.

Tersebut pulo kabar berito adik nan bungsu banamo Puti Serunduk Pinang Masak menghadap menyembah kepado ayah Tuanku Rajo untuk mencari kakak kandungnyo nan pegi dak ado kaba berito, dek lamo dalam perjalanan sampailah Puti Serunduk Pinang Masak di Dusun Teluk tempat kakaknyo Sutan Karamayana Karamayudo, lah batemu Puti Serudung Pinang Masak dengan Sutan Karamayana Karamayudo, mako dipanggilnyo pulo Sutan Tenggiling Singo Yahudo untuk berunding bamupakat siapo nan kamenjadi Rajo. Putuih runding dek mupakat mako Puti Serunduk Pinang Masak yang berhak menjadi Rajo.

Lah tentu nan kamenjadi Rajo mako mengilirlah Nyo mencari Tanah Pilih dengan perahu mengikuti itik nan duo, lah sampai Ditanah Pilih, mako naeklah itik, pertando disitu tempat membuat negeri mendirikan Rajo, yang dinamokan Tanah Pilih, itulah yg disebut Angso Duo kini dalam Kota Jambi.

Rajo memerintah adil bijaksano, negeri berkembang serto maju, rakyat aman serta sentosa, sehinggo terdenga berito sampai Kemuaro diselat Berhalo disitu ado seorang Rajo Datuk Peduko Berhalo. Alkisak cerito Datuk Paduko Berhalo menjadi Suami Puti Serudung Pinang Masak.

Balik kepado kisak Sutan Karamayana Karamayudo, dengan Sutan Tenggiling Singo Yahudo, kareno lah menjadi Rajo nan berkaso serto lah bersuami, baliklah Sutan Karamayana Karamayudo ke Dusun Teluk dan Sutan Tenggiling Singo Yahudo ke Sungai Bakupeh membentuk Bathin diwilayak nan dikuasoinnyo.

Sutan Karamayana Karamayudo di Dusun Teluk, ado mempunyai anak batigo, nan Tuo banamo Ngebi Singo Dilago nan disebut Sirajo Gajah bamikim batempat tinggal di Teluk Panjang. Nan Kaduo Ngebi Jago Yudo disebut Tuan Bujang Maha Rajo, bamukim batempat tinggal di Tanjung Menanti, ktigo Mayang Mangurai disebut Puti Singado bamukim batempat tinggal di Air Gemuruh. Katigo anak Rajo Sutan Karamayana Karamayudo, masing-masing membentuk daerah kekuasaan yang dinamokan Bathin Nan Batigo mako tasebut Diteluk Panjang Pasak Kemuning, Tanjung Menanti Muko-moko di Air Gemuruh Pusat Jalo, Bathin Nan Batigo itulah nan Disebut Bathin Tigo Hilir. Pado mulonyo ketigo Bathin itu dipimpin oleh seorang benamo Rio Suko Negeri yang diambil dari tigo wajah Bathin tersebut.

Setelah Belando memerintah, Rio Suko Negeri menjadi Pesirah Bathin Tigo Hilir, jugo diambil dari ketigo wajah Bathin Batigo. Dan masing-masing wajah Bathin Nan Batigo di bentuk , kedudukannyo dibawah Pengawasan Pasirah. Namun untuk memutus suatu pekaro yang sulit tetap dari wajah Bathin Batigo, yaitu Teluk Panjang, Air Gemuruh dan Tanjung Menanti.

Tersebut dalam sejarah Bathin, seberapo banyak Dusun nan berkembang di wilayah Bathin Tigo Hilir nan berhak bergelar adolah Dusun Nan Tigo Wajah tersebut.

Sejak terbentuknyo batin nan batigo, dengan gelanyo Rio, dari penjajahan sampai kemerdekaan sampai tahun 1979, dengan berlakunyo Undang-undang Nomor 5 Tahun 1979, sebutan Rio di tukar dengan Kepala Desa, Sehinggo Dusun-dusun berkembang dipimpin oleh Kepala Desa langsung dibawah pengawasan Camat, dan sebutan Pasirah dihapus, sebutan Bathin Tigo Hilir hilang.

Dengan berlakunyo Undang-undang Nomor 22 Tahun 1999, wilayah kecamatan Bathin Tigo Hilir menjadi Kecamatan Muara Bungo. Bathin Tigo Hilir nan Tigo Wajah tinggal lagi duo Wajah, yaitu Teluk panjang dan Air Gemuruh. Wajah Tanjung Menanti diambil oleh Kecamatan Bathin Duo Babeko.

Kenudian dengan berlakunyo Undang-undang Nomor 32 Tahun 2004 yang didukung oleh Peraturan Daerah Kabupaten Bungo Nomor 9 Tahun 2005, Kecamatan Muara Bungo yang terdiri wilayah Bathin Tigo Hilir Berwajah Duo Bathin, dikembangkan lagi menjadi Empat Kecamatan yaitu :

1.     Kecamatan Pasar Muara Bungo

2.     Kecamatan Rimbo Tengah

3.     Kecamatan Bungo Dani

4.     Kecamatan Bathin III

Kecamatan Pasar Muara Bungo, Kecamatan Rimbo Tengah, Kecamatan Bungo Dani adalah Dusun-dusun perkembangan Bathin Tigo Hilir (Bathin Tigo Wajah). Kecamatan Bathin III, adolah Dusun Bathin Tigo Hilir dari wajah nan Baduo.

Itulah sebabnyo Kecamatan Bathin III tidak dinamokan Kecamatan Bathin Tigo Hilir (Kareno wajah nan batigo sudah hilang satu).

Sekali ayik dalam sekali tebing runtuh, tanjung putuih pulaupun beralih, dengan berlakunyo Peraturan Daerah Nomor 9 Tahun 2007 mako sebutan Desa kembali disebut Dusun, sebutan Kepala Desa balik menjadi Rio, sebutan Dusun menjadi Kampung. Nan disebut Rio zaman kiniko bukan berdasar dari wajah wajah (Bathin-bathin zaman dahulu), zaman kini berarti Kepala Dusun. Namun martabatnyo disamokan dengan yang berwajah Bathin zaman Dahulu.

Tembilang penggali langsat,

kini taletak diatas lantai.

Lahdibilang mano nan dapat,

nan tinggal untuk nan pandai.

Anak sabak pegi ke Jambi,

ambik karang dengan lokan,

Ninek Mamak samo sekali,

jiko salah mohon maafkan.

Air Gemuruh, 05 April 2008 Lembagha Adat Kecamatan Bathin III Ketua Bidang Hukum Adat dan Pembangunan BUSTANUDDIN

Sumber  :          IKHTISAR USUL ASAL KERAJAAN JAMBI DAN ADAT ISTIADAT PUCUK JAMBI SEMBILAN LURAH

                         Oleh Ninek Mamak Bathin III Iliruah kecamatan di Kabupaten Bungo, Jambi, Indonesia.