Apa Karya
Apa Karya, nan aseuli Zakaria Saman nakeuh salah sidroe tokoh lam kawan Geurakan Acèh Merdèka, GAM. Gopnyan lahé di Keumala, Pidie, Aceh bak tanggai 1 buluen Sa thôn 1946 Miladiyah.
Jeut keu Meuntroe Pertahanan Geurakan Acèh Merdèka yôh mantong neupimpén lé Wali Nanggroe Tgk. Hasan Muhammad di Tiro.
Lam masa konflik di Acèh Apa Karya geutubiet u luwa nanggroe karena jimita-mita ĺé aparat keamanan Indônèsia, watèe geuplueng nyan ret Malaysia bak buluen Maret 1978 meusigo ngon Dr. Zaini Abdullah, Gubernur Acèh thôn 2012-2017. Urueng nyan geujak u Swedia, tinggai padum na trép di sidéh sampé jeut keu warga naggroe di Swedia nyan.
Apa Karya rôh lam anggèta Grup 42, areuti jih gopnyan rôh lam kawan urueng nyang meureumpok latihan di Swedia, lam thôn 1985. Apa Kayra jeut takheun gopnyan saboh angkatan ngon Muzakir Manaf, Beukaih Waki Gubernur Acèh thôn 2012-2017.
Lam thôn 2000 atawa leubèh Nan Zakaria Saman Alias Apa Karya brat jithèi trôh u luwa, saweueb gopnyan dikheun na rôh peutamong Beudé u Acèh, na nyang peugah budé nyan geucok nibak naggroe Thailand, teuma bak saboh masa awak Serambi_Indonesia na jitanyong bhaih nyan, Apa geujaweub sira geukhém: “Mana ada senjata AK di Thailand. Itu daerah wisata...ha.. ha .ha,” (Panèe na budé AK di Thailand, nyan kon dairah wisata.. Ha.. ha. ha,) Memang Apa Karya kayém that tubiet-tamong u Thailand, karena toe ngon Acèh,meunan pengakuan Apa Karya.
Apa Karya rôh chit lam urueng peunténg bak peudong Peureuté Acèh (PA ; Partai Aceh),gopnyan rôh chit lom keu seubagoe Tuha Peuet disinan. Bak tanggai 23 Maret 2016 gopnyan geu undô droe nibak jabatan Tuha Peuet saweueb geucalon droe keu Gubernur Aceh lam Pilkada thôn 2017 ret jalur indepéndén, ngon calon wakil gubernur watèenyan Ir .H .T. Alaidinsyah, M.Eng.
Meukeusud Apa Karya geucalon droe nakeuh meutujuan keu neuk peujuang aneuk-aneuk yatim ngon fakir miskin, janda-janda korban konflik atawa non-konflik watèenyan mangat leubèh get teuhiroe ngon na soe padoli.
Apa Karya hana teupiléh keu Gubernur watényan, nyang rhet keu gubernur na keuh Irwandi Yusuf nyang meupasangan ngon Nova Iriansyah.
Jinoe Apa kayém na gi gampông, di Keumala. Ka neupeuget rumoh, toe bak binèh jalan jak u Tangsé, meujan na chit ta kalon gopnyan di Lameulo, meujan na chit geuduek bak poih jaga geupoh cakra ngon urueng lingka nyang na disinan.